Gipahibalo ni Jay Caren Bucol nga ilubong karong Disyembre 19, 2025 ang iyang manghod nga si Barangay Tres de Mayo Kapitan Oscar “Dodong” Bucol. Ang misa sa paghatod pagahimoon alas 2 sa hapon sa San Isidro Parish Church, ug dayon dad-on ang iyang lawas ngadto sa Digos City Memorial Park.
Matod ni Caren, bug-at para kaniya ang pagdesisyon nga ilubong ang igsuon nga wala pa makab-ot ang hustisya. Kon siya lang ang pabut-on, dili pa unta niya gustong ilubong si Kapitan Oscar hangtod dili pa maklaro ang resulta sa imbestigasyon. Apan human makigsabot sa ilang ginikanan ug uban pang sakop sa pamilya, nasabtan niyang taas ug komplikado ang proseso sa pagdangat og hustisya.
Tungod niini, nagkahiusa ang pamilya Bucol sa pagpalubong kang Kapitan Oscar, apan nagpabilin silang lig-on sa ilang determinasyon nga ipadayon ang pagpaningkamot aron makab-ot ang hustisya alang sa kapitan nga nailhan sa iyang matinud-anon ug tinuoray nga pag-alagad sa Barangay Tres de Mayo.
