Gibutyag sa City Social Welfare and Development Office (CSWDO) sa Iligan ang mga kusganong lakang nga ilang gihimo aron mapatuman ang Anti-Mendicancy Law ug masumpo ang padayong pagpakilimos sa kadalanan.
Sumala ni Maria Luisa A. Yap, Focal Person for Street Children sa CSWDO-Iligan, gipatawag na sa buhatan ang mga lider sa Badjao aron pangutan-on kung nganong padayon pa gihapon ang presensya sa mga Badjao nga nagpakilimos sa syudad, ug aron masuta kung sila ba mga parente, lumad, o residente na ba sa Iligan.
Gipatin-aw usab ni Yap nga ilang gisusi ang hinungdan ngano nga gitugotan o gi-awhag ang pipila ka indibidwal, ilabina ang mga bata, sa pagpakilimos sa kadalanan.
Gidugang pa niya nga ang mga batang magpakilimos kuhaon sa CSWDO aron hatagan og hustong interbensyon, samtang lahi ang trato sa mga bata nga nanarbaho pinaagi sa pagpamaligya sama sa mga tuwalya.
Matod pa sa CSWDO, padayon ang ilang panawagan sa publiko nga dili maghatag og limos sa kadalanan ug imbis, i-report sa buhatan ang mga insidente aron matabangan ang mga apektadong indibidwal pinaagi sa husto ug lig-on nga programa sa gobyerno.
