Patay ang duha ka tawo samtang walo ang samaran sa insidente sa pagpamusil sulod sa Brown University, ug padayon pa karon ang pagpangita sa suspek.
Sumala sa inisyal nga report sa Providence Police Department, nahitabo ang pagpamusil bandang alas-4 sa hapon duol sa Barus ug Holley Building sa maong unibersidad, sa takna nga nagpadayon ang nagkadaiyang mga eksaminasyon.
Sa pagkakaron, nagpadayon ang gipalapdang manhunt batok sa suspek nga wala pa mailhi ang pagkatawo.
Wala pa usab klaro kon giunsa niini ang pagsulod sa campus.
Sumala sa usa ka saksi, ang suspek ulahing namatikdan nga nakasuot og itom nga suot gikan ulo hangtod tiil, ug gituohang wala pa kini makapalayo sa lugar nga nahitabo ang insidente.
Tungod niini, gipailalom sa total lockdown ang tibuok campus sa Brown University hangtod dili pa madakpan ang gunman.
Gidid-an ang mga estudyante sa paggawas ug gipasidan-an silang ipabiling sirado ang mga pultahan sa ilang mga kwarto, samtang temporaryong gipahunong ang paglihok sulod sa campus.
Samtang, padayon ang paghatag og medikal nga atensyon sa mga samaran nga biktima nga karon ginadumala ug ginapailalom sa pag-atiman sa Rhode Island Hospital.
Photo Courtesy to: BRC
