Nasikop sa gipahigayong manhunt operation sa Criminal Investigation and Detection Group (CIDG) – Surigao del Norte Provincial Field Unit ang usa ka kanhing “Amazona” pinaagi sa warrant of arrest alang sa kaso nga multiple attempted murder ug frustrated murder, Kagahapon.
Gipaila ang suspetsada nga si alyas “Hannah,” 27-anyos, ug kanhing miyembro sa Communist Terrorist Group (CTG) nga misilbi isip Platoon Medic sa usa ka armadong grupo.
Si Hannah nalakip sa Periodic Status Report of Listed Target Groups (PSRLTG) sa Armed Forces of the Philippines (AFP) para sa 4th quarter sa 2023.
Sumala sa imbestigasyon, niadtong 2022, si Hannah kauban ang walo pa ka miyembro sa grupo ang mipabuto og high-powered firearms batok sa mga otoridad, nga misangpot sa halos pagkamatay sa usa ka sundalo.
Gipasalig usab sa CIDG -Surigao del Norte nga padayon nilang gukdon ang mga kriminal, wanted persons ug mga pugante subay sa mandato.
