Samaran ang usa ka 14-anyos nga estudyante (wala na hinganli) kinsa gitigbas sa kalalis nga 16-anyos nga suspek, human sa ilang duwa nga basketball, bandang alas-9:55 sa gabie Disyembre 9, 2025. Ang duha parehong residente sa Barangay Mamangan, San Isidro, Davao del Norte.
Subay sa taho nga nahipos sa San Isidro Municipal Police Station, nakumpirma ang insidente alas 7:00 sa gabie, sa maong petsa, diin nagdula og basketball ang duha ka batan-on, kauban ilang mga teammate sa covered court sa barangay, dihang nagka-initay ug nahimong agresibo ang dula. Giingong gituyo og bangga sa suspek ang biktima, hinungdan sa panaglalis nga gibadlong pa sa ilang mga kaubanan.
Gisultian sa biktima ang suspek nga maghulat siya niini sa Purok Calachuche sa samang lungsod, rason nga milakaw ang suspetsado paingon sa ilang balay, apan mibalik kini og nagdala na og sundang, dayon gitigbas ang biktima igo sa likod ug tuo nga bukton.
Human sa panghitabo, gilayong misibat ang 16-anyos nga suspek sakay sa motorsiklo paingon sa wala matino nga direksyon.
Samtang dali usab nga gidala ang biktima sa DRMC Ward Extension (Infirmary) sa Brgy. Sawata, San Isidro alang sa medikal nga atensyon ayha gibalhin sa DRMC Tagum City.
Sa pagkakaron, padayong gipangita sa kapulisan ang suspetsado nga sa gihapon gawasnon pa.
Photo Courtesy to: RALEIGHNC.GOV
