Naghatag og pahimangno ang Department of Trade and Industry o DTI Lanao del Norte ngadto sa publiko nga magbantay sa online shopping ug sales promotions ilabi na karong holiday season.
Gipahinumdom sa DTI nga magmatngon ang mga konsumer sa mga promotional offers nga gitawag og “too good to be true”, tungod kay kasagaran kini gigamit sa mga scammer ug sa dili patas nga mga praktis sa pamaligya.
Gipasiugda usab sa buhatan nga kinahanglan susihon sa publiko ang mga detalye sa promo lakip ang presensya sa DTI Fair Trade Permit number, klaro nga duration sa promo, karaan ug regular nga presyo aron masuta ang tinuod nga diskwento, ug ang lehitimong social media pages ug feedback gikan sa mga sellers.
Gipahimangno usab sa DTI ang publiko batok sa mga produkto sama sa mga giingong energy-saving gadgets nga walay legal nga sertipikasyon o adunay peke nga dokumento. Matud sa buhatan, ang paggamit sa mga produkto nga walay lehitimong testing ug sertipiko mahimong maghatag og seryosong risgo sa kaluwasan sa mga konsumer.
Sumala ni John Clifford Fernan, Division Chief sa Consumer Protection Division sa DTI Lanao del Norte, padayon ang ilang pagpagawas og mga advisory ug pahimangno aron maprotektahan ang publiko batok sa online scams, peke nga mga produkto, ug dili patas nga pamaligya sa merkado.
Photo courtesy to: TimesOfIndea
