Nasikop sa mga personahe sa Mati City Police Station ang upat ka mga indibidwal human nga nalambigit sa ilegal nga pagpangisda didto sa kadagatan sa Pujada Bay, Barangay Tamisan, Mati City, Davao Oriental niadtong Disyembre 10, 2025.
Ang operasyon ilalom sa pagpanguna ni PLTCOL FREDERICK C. SA-AO, ACOP-Mati CPS ug ubos sa paggiya ni PCOL RITCHIE S. BUCOL, Provincial Director, DOPPO, diin kini nga lakang nagpakita sa padayon sa pagpalig-on sa kampanya batok sa mga ilegal nga kalihokan sa dakbayan.
Ang maong malampuson nga operasyon nagpakita usab sa lig-on nga pasalig sa Mati CPS sa pagsuporta sa balaod, pagpanalipod sa marine biodiversity ug pagpanalipod sa panginabuhi sa katawhan.
Sa kasamtangan ang 4 ka mga dinakpan mag-atubang sa kasong paglapas sa RA 10654 (Act to Prevent, Deter and Eliminate Illegal, Unreported and Unregulated Fishing) ug RA 9147 (Act Providing for the Conservation and Protection of Wildlife Resources).
Gipahimangnoan usab ang publiko nga mahimong responsable sa lihok ug likayan ang pagpangisda sa illegal nga pamaagi.
Photo Courtesy to:Mati City Police Station
