Gipusil ang usa minero kinsa igo lang matod pa naghulat og sakyanan, bandang alas-3 sa hapon, Disyembre 9, 2025 sa Km. 61, Prk. Lansones, Brgy. Pandapan, Tagum City.
Giila sa Tagum City Police Station ang biktima nga si alyas Alvin, 40-anyos, adunay kapuyo, residente sa Prk. 3, Brgy., Bukal, Nabunturan, Davao de Oro.
Subay sa inisyal nga imbistigasyon, gibutyag sa kapuyo niining si alyas Cris, nga samtang naghulat sila og sakyanan padulong sa syudad sa Tagum, usa ka blue/white XTZ nga motorsiklo ang mihunong ug nangutana ang angkas asa ang padulong sa Mawab? Apan kalit usab kining mibunlot og armas dayon gipusil duha ka higayon ang biktima nga niigo sa tuo nga aping ug nigawas sa likod sa iyang liog, hinungdan sa pagkahagba niini, samtang abtik usab nga nisibat ang mga suspek padulong sa direksyon sa Mawab Davao de Oro.
Narekober sa Crime scene ang duha ka mga basiyo sa bala sa gituohang .45 calibre nga pistola.
Sa pagkakaron, nagmando na ang hepe sa kapulisan sa dakbayan og dragnet operation ug koordinasyon sa mga silingang estasyon aron masikop ang mga suspek.
Dugang sa hepe nga gituohang personal nga dumot ang motibo sa maong krimen, apan padayon sa gihapon nga susihon sa kapulisan ang lain pang anggulo kalabot sa maong insedente.
