Daling girespondihan sa mga personahe sa Coast Guard Station Davao Oriental uban sa CGSS Dahican ug HSRB-033 ang usa ka insidente ug mibuhat gilayon ug Medical Evacuation sa usa ka tripulante nga nasamdan kinsa nakaangkon ug paso sa MV Dream Power pasado alas 7:20 sa milabayng buntag.
Pag-abot sa area daling mihatag ug medikal nga tabang ang mga personahe aron ma-stabilize ang kahimtang sa nasamdan nga tripulante. Human niini, luwas nga gibalhin ang pasyente gikan sa MV Dream Power ngadto sa Light Boat alang sa pagdala balik sa mainland.
Pag-abot sa Mati Wharf daling gitugyan ngadto sa naghulat nga ambulansya ang biktima alang sa dinaliang medikal nga transportasyon padulong ngadto sa Davao Doctors Hospital.
Kini nga inisyatiba nagpakita sa ilang dedikasyon, paspas nga pagtubag ug pasalig sa pagluwas sa mga kinabuhi sa tawo nga anaa sa kadagatan. Nagbarug usab kini isip usa ka testamento sa dili matarug nga kaandam ug propesyonalismo sa Philippine Coast Guard sa pagtubag sa mga emerhensya.
Nagpaabot usab sila ug pagpasalamat sa tanang personnel nga nalambigit sa ilang talagsaong teamwork ug makanunayon nga pasalig sa serbisyo publiko.
