Naghatag og kadasig sa mga kandidato ug mga kontraktor ang desisyon sa Commission on Elections (Comelec) Political Finance and Affairs Department (PFAD) nga walay tulubagon si Sen. Francis “Chiz” Escudero sa Php30 milyon nga donasyon sa kampanya gikan sa usa ka kontraktor.
Ang donor, si Lawrence Lubiano, adunay mga kompanya nga nakakuha og mga kontrata sa Sorsogon, diin si Escudero ang gobernador sa wala pa modagan pagkasenador niadtong 2022. Apan sumala sa PFAD, bulag si Lubiano gikan sa iyang mga kompanya, busa, ang donasyon giingong wala molapas sa balaod.
Matod ni Danilo Arao sa Kontra Daya, nagpadala kini og sayop nga mensahe nga mahimo gihapon nga modawat og pondo gikan sa kontraktor basta indibidwal ang deklarasyon. Iyang gihisgotan nga supak kini sa katuyoan sa Statement of Contributions and Expenditures (SOCE) nga sigurohon ang kaangayan (fairness) ug transparency sa eleksyon.
Si Eric Jude Alvia sa NAMFREL miingon nga mahimo kini nga mag-aghat sa mga kandidato nga aktibong mangayo og donasyon gikan sa mga adunahang tawo bisan pa og aduna’y potensyal nga conflict of interest. Iyang gihisgotan usab nga angay susihon kon ang donor adunay personal nga interes batok sa katungdanan sa kandidato.
Matod ni Arao, kinahanglan ipakita sa Comelec ang tibuok SOCE ug mga annexes aron mahibaloan sa publiko ang kinatibuk-ang datos sa donasyon. Nanawagan usab siya nga angay i-update sa real-time ang SOCE online aron malikayan ang paglapas sa balaod ug ma-monitor ang spending limit per voter.
Naghatag usab og suhestiyon si Arao nga pondohan sa gobyerno ang gasto sa kampanya aron patas ang mga kandidato ug malikayan ang pagsalig sa mga contractor-donors. Samtang, gusto ni Alvia nga palapdan ang coverage sa SOCE hangtod usa ka tuig sa dili pa magsugod ang opisyal nga kandidatura aron dili matago ang mga transaksyon sa kampanya.
Karon, anaa na sa Comelec en banc ang kaso ni Escudero ug gipaabot ang pinal nga desisyon. Gikabalaka sa mga eksperto nga ang desisyon sa PFAD mahimong precedent alang sa umaabot nga mga eleksyon, diin ang mga adunahang donor ug kontraktor mahimong makabaton og impluwensya sa mga kandidato.
Photo courtesy: Kontra Daya/ Facebook
