Nakab-ot sa Surigao del Sur Police Provincial Office (SDSPPO) ang usa ka dakong kalampusan human nila nadakpan ang Top 2 Most Wanted Person sa probinsya, si Alias “Yoyoy”, 40-anyos, residente sa Barangay Maitum, Tandag City. Nahitabo ang operasyon niadtong 4:50 PM, Nobyembre 30, 2025, sa Barangay Maticdum, Tandag City, nga gipangulohan ni PMAJ Magdalino G. Pimentel, Jr., ubos sa direktang pagdumala ni PCOL Jeffrey Lawrence D. Mauricio, Provincial Director sa SDSPPO.
Si Alias Yoyoy giila usab nga No. 3 Most Wanted Person sa Caraga Region ug adunay arrest warrant alang sa kaso sa Murder ilalum sa Article 248 sa Revised Penal Code, nga gi-issue sa RTC Branch 27 sa Tandag City, nga walay girekomenda nga pyansa.
Sa pagdakop, nakumpiska usab ang usa ka illegal 9mm Norinco pistol, kauban ang usa ka magazine ug tulo ka live rounds, nga magdala sa dugang kasong paglapas sa Republic Act No. 10591 (Comprehensive Firearms and Ammunition Regulation Act).
Gi-awhag usab sa kapulisan ang publiko nga padayon nga suportahan ang mga inisyatibo sa kapulisan alang sa kalinaw ug seguridad sa probinsya.
Photo courtesy: SDSPPO
