Sunod-sunod nga lihok protesta ang gilunsad sa pipila ka grupo sa dakbayan sa Cagayan de Oro kini alayon sa Trillion Peso March ngadto sa kauluhan kagahapong adlawa nga nagtumong sa pagbatok sa naghitak nga korapsyon sa nasud.
Adlawng sabado, gilunsad ang MINDANAWON KONTRA KORAPSYON nga gisalmutan sa gatusan ka katawhan gikan sa nagkadaiyang sektor ug lain-lain nga pagtuo. Sa mubo nga programa nga ilang gipahigayon sa Gaston Park, dako ang ilahang panghinaot nga ang katawhan dili lang taman sa kasuko apan kinahanglan pamalandungan ang nagahitabo sa nasud labi na diha sa pagpangita og kasulbaran.
Sumala pa ni Nestor Banuag sa grupong Kagay-anon Kontra Korapsyon kon KKK nga ang pagsolbad sa korapsyon, labing gikinahanglan nga magsugod sa matag kaugalingon. Naga-anad ang mga opisyal sa gobyerno nga mangawat sa kaban, kung asa ilahang gihimong himan ang pagpanghatag og ayuda sa katawhan aron nga sila magpabalin diha sa gahum.
Hapon sa adlawng sabado, nagpagula sa ilahang joint statement ang Iglesia Filipina Independiente ug United Church of Christ in the Philippines sa ilahang pakigduyog sa katawhan diha sa pagbatok sa grabeng korapsyon sa nasud. Sa ilahang pamahayag, klaro nga kwestyon sa moral ug dakong sala ang pagpangawat ug korapsyon tungod daghang kinabuhi ang nakalas sa kapalpak nga sistema sa gobyerno.
Samtang kagahapong adlawa, laing lihok protesta sab ang gipahigayon sa mga progresibong pundok, kung asa nag-unang panawagan nila ang pagpanubag sa tanang korap, pagparesign kang Presidente Marcos ug Bise Presidente Duterte nga parehong ginalambigit sa hitak nga korapsyon.
Sa pikas bahin, nang hinaot ang simbahan sa Archdiocese of Cagayan de Oro nga makab-ot ang tiunay nga kalinaw sa komunidad pinaagi sa paghiusa sa mga tao batok sa korapsyon.
Kini ang nakita ni Archbishop Emeritus Antonio Ledesma atol sa gihimo nga prayer rally sa Gaston Park sa syudad adlaw nga sabado.
Gikabtuyag pa ni Archibishop Ledesma nga parte lang ang syudad sa nationwide nga kalihukan batok sa korapsyon nga nahitabo sa mga infra projects nga nag dili epektibo panahon sa bagyo. Gilauman ni Ledesma nga mahimo ni nga yawe sa pagka hiusa ug tinooray nga kalinaw.
