Gisugyot ni Las Piñas Representative Mark Anthony Santos ang usa ka balaod nga nagtinguha sa paghatag og Universal Social Pension sa tanan nga senior citizen sa nasod, bisan unsa pa ang ilang pinansyal nga kahimtang o estado sa kinabuhi.
Pinaagi sa House Bill 1296, tangtangon niini ang kasamtangang requirement sa “indigency”. Tumong sa maong sugyot nga walay senior citizen nga mapakyas sa pagdawat sa angay nilang pinansyal nga tabang.
Sa kasamtangan, ang ₱1,000 nga pensyon kada buwan gikan sa Department of Social Welfare and Development (DSWD) gi-allocate lamang sa mga indigent senior citizens. Sumala sa mambabalaod, dili kini igo nga kantidad aron matubag ang nagkadako nga panginahanglan sa mga senior, labi na sa padayon nga pagsaka sa presyo sa mga palaliton.
Uban sa bag-ong sugyot, ang tanan nga Pilipino nga edad 60 pataas mamahimong adunay katungod sa social pension. Ang kantidad niini i-base sa lebel sa inflation ug sa kasamtangang cost of living aron masiguro nga igo ang suporta sa ilang panginahanglan.
Giingon ni Rep. Santos nga pinaagi sa maong sugyot, mas mapalapad ang coverage sa pensyon, ug walay senior citizen ang mabiyaan sa pagdawat sa angay nilang tabang pinansyal.
Ang House Bill 1296 nagtinguha sa mas inclusive nga social protection system aron mapalig-on ang kahimtang sa mga katigulangan sa tibuok nasod.
