Gipahibalo sa Department of Foreign Affairs (DFA) nga andam ang tanang embahada ug konsulado sa Pilipinas sa lain-laing nasod aron motabang kung buot sa mga suspek sa flood control scandal nga mosurender samtang naa pa sila sa gawas sa nasod.
Sumala sa DFA, naka-standby ang mga embahada sa New Zealand ug Jordan, lakip ang Consulate General sa New York, aron makig-koordinar kung adunay mando nga ipatuman gikan sa mga awtoridad sa Pilipinas.
Kini human ipahibalo sa DILG nga pipila sa giingong mga nalambigit sa anomalya anaa pa sa abroad, lakip si kanhi Ako Bicol Representative Zaldy Co, nga katapusan nakitang tua sa Japan. Si Co ug 15 pa ka ubanan nag-atubang sa kaso nga graft ug malversation.
Base sa report sa DILG ug PNP nga si Aderma Angelie Alcazar sa Sunwest Construction anaa karon sa New Zealand; Si Cesar Buenaventura, treasurer sa Sunwest, anaa sa New York; Ug si Montrexis Tamayo sa DPWH anaa sa Jordan.
Ang kaso may kalabotan sa giingong substandard nga Php289-milyon nga road dike project sa Naujan, Oriental Mindoro.
Sa laing bahin, gipahibalo ni President Ferdinand Marcos Jr. nga pito sa 16 nga adunay arrest order anaa na sa kustodiya sa gobyerno. Gi-awhag usab niya ang uban pang suspek nga mosurender na aron matubang ang ilang mga kaso.
Photo courtesy: PNA
