Gisugdan na sa Department of Trade and Industry RAPID Growth Project Davao del Sur Provincial Coordinating Unit ang ilang Sloping Agricultural Land Technology (SALT) ug Integrated Pest and Disease Management (IPDM) training alang sa mga mag-uuma sa Binaton Bagobo Tagabawa Farmers Livelihood Association.
Atol sa aktibidad, gipresentar ang detalyadong diskusyon sa SALT nga gitutokan ang hustong pamaagi sa pagdumala sa lasang ug yutang anaw-anaw. Gisundan kini og hands-on field demonstration aron mas masabtan sa mga partisipante ang teoriya nga gitudlo sa lecture.
Gihatagan usab og praktikal nga pagbansay ang mga mag-uuma bahin sa IPDM, diin giemphasize ang paggamit sa Biocon-based solutions sama sa Trichoderma ug Beauveria bassiana aron mapalambo ang sustainable ug environment-friendly nga pamaagi sa pagpanguma.
Tumong sa maong training nga mapaligon ang abilidad sa mga mag-uuma sa produksiyon ug mapauswag ang ilang papel sa value chain lakip na ang pagmintinar og kasaligan nga supply, pag-abot sa market-quality standards, ug pagpalig-on sa ilang kompetitibidad.
Gipundok sa sesyon ang 68 ka partisipante nga sakop sa BBTAFLA lakip ang kabatan-onan, kababayen-an, ug senior citizens. Gidumala kini sa Rempong Village, Binaton, Digos City, nga nagpakita sa kusganong panaghiusa sa komunidad aron magtukod og climate-resilient ug mas produktibong sistema sa pagpanguma.
SOURCE: DTI DAVAO DEL SUR
