Gideklarar sa Philippine Drug Enforcement Agency (PDEA) Caraga ang Tandag City nga opisyal nang drug-free human kini nakapasar sa hugot nga ebalwasyon ug nakatuman sa tanang rekisitos nga gipangayo sa ahensya.
Gipasidunggan ang dakbayan pinaagi sa usa ka plaque of recognition nga personal nga gidawat ni Vice Mayor Eleanor Momo kauban ang mga miyembro sa Sangguniang Panlungsod. Gitunol mismo ang maong pasidungog ni Laurefel Gabales, Regional Director sa PDEA Caraga, atol sa seremonyas nga gipahigayon niadtong nakalabay nga adlaw sa dakbayan.
Sumala sa PDEA Caraga, nakuha sa Tandag ang maong pag-ila human kini nakasunod sa mga kriteriya nga gitakda sa ahensya, lakip ang lig-on nga kampanya batok sa ilegal nga droga, aktibong partisipasyon sa komunidad, ug epektibong koordinasyon sa mga otoridad.
Bisan pa sa maong kalampusan, gipadayag sa lokal nga mga opisyal nga dili sila magpakakampante ug padayunon gihapon ang pagmonitor sa mga barangay ug pagpalig-on sa kampanya batok sa ilegal nga droga aron masiguro nga magpabiling luwas ug limpyo ang syudad.
Ang pagdeklara sa Tandag isip drug-free usa ka dakong kalampusan sa lokal nga panggamhanan ug sa mga ahensya nga nagtinabangay aron maprotektahan ang komunidad batok sa hulga sa ilegal nga droga.
Photo courtesy: City Government of Tandag
