Gipahigayon sa Commission on Audit (COA) ang tinuig nga pag-audit sa Provincial Government sa Surigao del Sur gikan Nobyembre 2025 hangtod Pebrero 2026 ug nakaplagan nga adunay 424 ka mga empleyado nga adunay loan bisan pa man og ubos sa ₱5,000 ang ilang net take-home pay.
Gibutyag ni Gov. Johnny T. Pimentel nga sa bag-ohay nga exit conference niadtong miaging Biyernes, nakita sa COA nga mokabat sa 37 porsyento sa kinatibuk-ang permanenteng empleyado sa probinsya ang nakalapas sa Section 55 sa General Appropriations Act (GAA).
Sumala sa COA, bisan og ubos na sa ₱5,000 ang nahabiling net take-home pay sa pipila ka mga trabahante, gitugutan gihapon sila nga makautang o maka-loan, nga supak sa gitakdang regulasyon sa balaod.
Tungod niini, gimandoan sa COA ang probinsya nga kinahanglang mosunod sa mandato sa balaod aron masiguro ang mas hapsay nga pagdumala sa panalapi sa mga empleyado.
Isip dinaliang lakang, gipahibalo ni Gov. Pimentel nga nagpagawas na sila og memorandum order niadtong Enero 30 nga hugot nang nagdili sa pag-loan sa mga empleyado kansang sweldo anaa na lamang sa ubos sa ₱5,000 ang net take-home pay. Tumong niini nga masiguro nga aduna pa silay magamit alang sa ilang inadlaw-adlaw nga panginahanglan ug malikayan ang sobrang pagpangutang.
