Gipatim-aw na si kanhi Rep. Zaldy Co aron ipresentar ang bug-at nga mga akusasyon batok sa administrasyon ni Presidente Ferdinand Marcos Jr. ug ni kanhi Speaker Martin Romualdez.
Sa iyang pahayag sa social media, gibutyag ni Co nga siya gisugo sa pagpatuman sa usa ka ₱100 bilyones nga kantidad sa proyekto nga ipasulod sa BICAM alang sa nasudnong badyet.
Matod ni Co, nagsugod ang tanan niadtong 2024 sa dihang gitawagan siya ni Budget Secretary Mina Pangandaman atol sa BICAM deliberations. Ang kalihim miingon nga ang mando gikan mismo sa Presidente aron isulod ang ₱100 bilyones nga proyekto sa pinal nga bersyon sa badyet.
Dugang pa niya, giingnan siya ni Pangandaman nga mahimo kining makumpirma kang Usec. Adrian Bersamin, kinsa matod sa kanhi kongresista, mipahayag nga tinuod ang direktiba gikan sa Presidente.
Gibutyag usab ni Co nga nagka-meeting sila sa Aguado Building duol sa Malacañang uban ni Romualdez, Pangandaman, Bersamin, ug Usec. Jojo Cadiz. Didto matud pa, gihatag ni Bersamin ang listahan sa mga proyekto nga nagkantidad og ₱100 bilyones. Matod niya, giingnan sa opisyal nga ang listahan “gikan mismo kang PBBM.”
Gisaysay ni Co nga gisugyot niya nga himuon na lang nga ₱50 bilyones ang ibutang sa program funds tungod kay dili kini angay molapas ang badyet sa DPWH sa DepEd. Ang nahibiling ₱50 bilyones mahimong ibutang sa unprogrammed funds, nga gidumala sa Office of the President.
Apan matod niya, gitawagan siya pag-usab ni Pangandaman ug gidala ang mensahe sa Presidente nga ipasulod ang dakong kantidad sa kwarta. Bisan pa sa iyang pagduhaduha, miingon si Co nga gituman niya ang sugo human gikumpirma ni Romualdez nga wala silay mahimo.
Gibutyag usab ni Co nga niadtong Hulyo 19, 2025, mibiya siya sa nasud alang sa medical check-up ug nagplano unta nga mobalik human sa SONA. Apan sa wala pa siya makauli, gimanduan matud pa siya ni Romualdez nga magpabilin nalang sa gawas sa nasud.
Phot courtesy: Zaldy Co/ Facebook
