Ginaawhag ang tanang katawhan nga mag-atiman ug magbinantayon sa panglawas aron nga malikay o mapugngan ang unsa mang mga balatian sama sa sakit nga diabetes.
Atol sa pagtimaan sa World Diabetes Day, gipasabot ni Dr. Sarael Brobo Jr, gikan sa Northern Mindanao Medical Center, ika-upat ang sakit nga diabetes nga hinungdan sa kamatayon sa mga Pilipino sa tibuok nasud kung asa wala kini ginapili nga edad.
Adunay lain-laing klase sa diabetes sama sa Type 1, Type 2, Gestational Diabetes ug daghan pa. Apan ning kasamtangan, mas daghang kaso sa diabetes nga resulta sa dili healthy nga diet, sobra nga timbang, stress ug kakuwang sa pisikal nga aktibidad kon sedentary lifestyle.
Naobserbahan ni Dr. Brobo nga ning daghan ang ilahang mga pasyente nga nagatrabaho og graveyard shift sama sa mga call center agents.
Dugang pa ni Dr. Brobo nga manageable ug pwede pang maprevent ang diabetes busa giawhag niya ang tanan, labi na kadtong adunay taas nga risgo nga magkadiabetes, nga himuong regular ang pagpa-screening tungod na sab kadaghanan sa mga tao wala masayod nga aduna na silay diabetes labi pa nga walay ginabating mga sintomas.
