Miabot sa NAIA Terminal 1 ang 346 ka Filipino repatriates nga biktima sa human trafficking sa Myanmar kagahapong adlawa, Nobyembre 12, 2025, pasado alas-3 sa hapon. Ang mga repatriates sakay sa chartered flight sa Philippine Airlines gikan sa Thailand.
Sumala sa Presidential Anti-Organized Crime Commission (PAOCC), ang mga Pilipino kabahin sa mga scam hubs sa KK Park, Myawaddy sa Myanmar, diin sila nadani ug na-exploit.
Gikumpirma sa PAOCC nga gitransfer ang mga biktima pinaagi sa Mae Sot River paingon sa Mae Sot, Thailand, ug gikan didto gidala sa Bangkok alang sa chartered flight pabalik sa Pilipinas.
Matod pa ni Migrant Workers Secretary Hans Leo Cacdac, ang mga repatriates ipailawom sa protocols sa Inter-Agency Council Against Trafficking sa Department of Justice tungod kay sila mga biktima sa human trafficking.
Pag-abot sa NAIA 1, gidala ang mga Pilipino sa usa ka hotel sa Pasay City alang sa temporaryong accomodation samtang nagpadayon ang proseso sa rehabilitation ug assessment sa ilang kahimtang.
Photo courtesy: SMNI
