Gipaniguro ni Paresident Ferdinand R. Marcos Jr. nga makadawat dayon og tabang ang mga residente nga naapektuhan sa Bagyong Tino, human niya gimandoan ang tanang ahensya sa gobyerno nga mohimo og paspas nga pagresponde sa kalamidad.
Sumala ni Presidential Communications Office (PCO) ug Palace Press Officer Undersecretary Claire Castro, anaa na sa mga apektadong lugar ang mga ahensya sa gobyerno aron maghatod og pagkaon, tambal, ug uban pang nanag-unang paninahanglan.
Gipahibalo ni Castro nga ang Department of Health (DOH) mipadala dayon og mga tambal, limpyo nga ilimnong tubig , hygiene kits, ug water containers ngadto sa Cebu, Aklan, ug Eastern Visayas nga maoy mga rehiyon nga grabing naaapektuhan.
Padayon usab ang pagbantay sa DOH sa posibleng hulga sa lahar sa Bulkang Kanlaon tungod sa nagpadayong pag-ulan.
Samtang, nang-apod-apod na usab ang Department of Social Welfare and Development (DSWD) og labaw sa 121,000mil ka family food packs ug 1,600mil ka ready-to-eat meals sa mga rehiyon sa CALABARZON, Bicol, Visayas, Caraga, ug pipila ka bahin sa NCR ug Zamboanga.
Malampuson usab kining nakapanghatag og pinansyal nga tabang sa mga pamilya nga nawad-an og mahal sa kinabuhi ug init nga pagkaon sa mga na-stranded nga pasahero ug motorista..
Sumala ni Castro, padayon nga gibantayan sa mga miyembro sa Gabinete ang sitwasyon aron masiguro ang dali nga paghatod sa tabang sa tanang naapektuhan nga lugar.
Samtang, gireport ni DICT Secretary Henry Aguda nga mitabang usab ang ilang ahensya sa mga nanag-unang telecommunications companies nga Dito, Globe, ug Smart aron mapaspasan ang pagpabalik sa komunikasyon sa mga lugar nga nadaot sa bagyo.
Photo courtesy to: newsinfo.inquirer.net
