Gipasabot sa kadumalahan sa Department of Social Welfare and Development (DSWD) Region-10 ang detalye sa bag-ong gipasar nga balaod nga naghatag og libreng funeral services alang sa mga pobreng pamilyang Pilipino, ubos sa Republic Act 12309 o “Granting Free Funeral Services to Poor Families.”
Sa eksklusibong pakighinabi sa Juander Radyo News Team ,gibutyag ni Roshiel M. Galia, DSWD Information Officer-Region-10, nga ang ahensya maoy gitahasan sa gobyerno sa pagpatuman sa funeral assistance ubos sa AICS Program o Assistance to Individuals in Crisis Situation.
Dugang pa ni Galia, napasar na ang balaod, apan wala pa kini mapatik sa Official Gazette , hinungdan nga naghulat pa ang DSWD sa Implementing Rules and Regulations (IRR) aron mahibal-an kung kinsa ang kwalipikadong makabenepisyo sa 100% coverage sa maong programa.
Ang RA 12309 naglatid sa tinuod nga diwa sa malasakit ug tabang sa gobyerno aron bisan sa katapusan, mabati gihapon sa katawhan ang pag-atiman ug serbisyo publiko.
