Gisiguro sa Philippine National Police (PNP) ang paghatag ug seguridad alang sa 3-ka-adlaw nga religious rally nga ipahigayon sa Rizal Park karong Nobyembre 16, 17 ug 18. Gipaabot nga moabot ang kapin 300,000 ka deboto nga motambong atol sa kalihokan, mao nga giuna sa PNP ang koordinasyon aron malikayan ang posibleng kagubot o kalihokan nga makasamok sa kahapsay sa lugar.
Naoadayon ang coordinating meetings sa PNP kauban ang lgu sa Lungsod sa Maynila ug ang mga organizers sa event aron maplastar ang crowd flow, mga entry ug exit points, medical assistance areas, ug deployment sa mga personnel sa ground. Ang tumong sa mga miting mao ang pag-establisar sa klaro ug epektibong sistema sa public safety ug emergency responses.
Gikatakda nga i-deploy ang 9,829 ka pulis gikan sa National Capital Region Police Office (NCRPO). Apil niini ang civil disturbance management teams, traffic enforcers, K9 units, medical teams, ug quick reaction forces nga andam mutubag sa tanang sitwasyon kon adunay emerhensiya. Giawhag usab ang mga sibilyan nga motambong nga magsunod sa mga patakaran sa seguridad.
Samtang, gipahimangno ni PNP Spokesperson PBGEN Randulf T. Tuaño nga dili lamang sa uniformed personnel nag-agad ang kaluwasan sa kalihokan, kondili katungdanan sab sa matag usa nga mosunod sa mga ipatuman nga protocol. Dugang pa niya nga ang pagsunod sa mga lagda makatabang nga mapalambo ang kalinaw ug kahapsay sa palibot sa event.
Gilauman usab ang busy nga kadalan sa palibot sa Rizal Park sa tulo ka adlaw nga kalihokan. Gidasig sa PNP ang mga motorista ug pasahero nga mutan-aw sa traffic advisories ug mag-andam sa mga alternatibong ruta. Dugang pa nga ang detalye kabahin sa crowd control setup, entry-exit points, ug traffic rerouting ipagawas human sa pinal nga coordination meeting.
Photo Courtesy to: Tempo
