Nanguna ang Pilipinas sa 2025 World Risk Index isip pinaka peligro nga nasod sa baha tali sa 193 ka mga nasod.
Base kini sa report sa Forest Foundation Philippines atol sa pagdungog sa House Committees on Sustainable Development Goals ug Climate Change niadtong Martes, Nobyembre 4.
Sumala ni Alaya de Leon sa Forest Foundation Philippines, kanunay nga apil sa top 3 ang Pilipinas tungod sa pagkabahin-bahin niini sa daghang mga isla ug sa kusog nga exposure sa mga extreme weather events. Karong tuiga, gipunting sa taho ang peligro sa pagbaha, ug nakita nga nagkalahi ang risgo matag rehiyon base sa geograpiya, imprastraktura, ug urban planning sa matag lugar.
Tungod niini, nanawagan si De Leon sa paggamit og nature-based ug sustainable solutions batok sa climate change imbes nga magsalig lang sa dagkong proyekto sama sa mga dam o sea wall.
Samtang si Rep. Jose Manuel Alba nibutyag nga dili igo ang imprastraktura aron masulbad ang epekto sa climate change ug kinahanglan nga pangkinaiyahan nga solusyon ang unahon.
Gidugang usab ni Rep. Aniela Tolentino nga ang nature-based solutions dili lang makahatag og proteksyon sa kinaiyahan, apan makahatag usab og panginabuhian sa mga komunidad ug mosuporta sa sustainable development goals.
Giingon pa sa mambabalaod nga prayoridad sa komite ang pagpasa sa Low Carbon Economy Bill, samtang ang DENR nagandam na og executive order alang sa mga polisiya sa pagpatuman sa nature-based solutions.
Photo courtesy: PRWC
