Sumala sa Philippine Institute of Volcanology and Seismology (PHIVOLCS), adunay hulga nga makasinati sa kusog nga linog ang Negros Island tungod sa Negros Trench, nga posibleng mohatag og magnitude 8.2 nga linog.
Matod ni PHIVOLCS Director Teresito Bacolcol, ang Negros Trench makita sa kasadpang bahin sa Negros Island, sa habagatan sa Sulu Trench, ug adunay gitas-on nga 400 kilometro. Kung kini molihok,masinati kini sa tibuok Negros ug adunay posibilidad nga mosunod ang tsunami sa kasadpang baybayon sa Negros ug Panay, nga posibleng makaabot pa sa Palawan ug Zamboanga.
Gipahimangnoan usab ni Bacolcol ang mga lumulupyo nga duol sa dagat nga magbantay sa mga natural nga timailhan sa tsunami sama sa kusog nga pag-uyog sa yuta, kalit nga pag-atras sa tubig sa baybayon, ug lanog nga gikan sa dagat.
Kung masinati ang bisan usa niini, dapat mobalhin dayon sa mas taas nga dapit ug dili na maglangan pa sa pagpangkuha og litrato o video.
Samtang, nagpabilin gihapon nga delikado ang Metro Manila sa posibleng magnitude 7.2 nga linog nga gikan sa West Valley Fault, nga bahin sa natural nga seismic cycle sa nasod.
Photo Courtesy to: BusinessWorld Online
