Gipahimangnoan sa Philippine Embassy sa Washington, D.C. ang mga Pilipino sa Jamaica nga mangandam alang sa umaabot nga Category 5 Hurricane Melissa, nga giisip nga labing kusog nga bagyo sa kalibutan karong tuiga.
Gihisgotan sa embahada nga nag-una nga prayoridad ang kaluwasan sa mga Pilipino sa apektadong lugar, ug giawhag ang mga residente nga itago ang importanteng mga dokumento ug magpabilin nga updated pinaagi sa opisyal nga balita ug abiso sa gobyerno.
Matod sa National Hurricane Center, gilaumang magdala ang bagyo og kaylap nga flash floods, landslides, kusog nga hangin, ug storm surge sa Jamaica, labi na sa habagatang baybayon. Susama nga peligro usab ang gilauman sa Haiti, Dominican Republic, sidlakang Cuba, ug pipila ka bahin sa Bahamas ug Turks and Caicos.
Adunay gibana-banaang 300 ka Pilipino sa Jamaica. Gilauman nga mawad-an og kuryente ug komunikasyon sa higayon nga moigo na ang bagyo.
Photo courtesy: Embassy of the Republic of the Philippines
