Gimando-an ni Presidente Ferdinand R. Marcos Jr. ang Department of Trade and Industry (DTI) nga ipatuman ang price freeze o pagpugong sa presyo sa mga batakang panginahanglanon ug prayoridad nga produkto hangtod sa katapusan sa tuig.
Ang maong lakang gituyo aron masiguro nga magpabilin nga lig-on ang presyo sa mga palaliton atol sa holiday season diin kasagaran motaas ang panginahanglan sa mga konsumidor.
Atol sa 47th Association of Southeast Asian Nations (ASEAN) Summit ug Related Summits nga gipahigayon sa Kuala Lumpur, Malaysia, gipahibalo ni Presidential Communications Office (PCO) Undersecretary ug Palace Press Officer Claire Castro ang mando sa Presidente. Matod pa niya, kabahin kini sa paningkamot sa gobyerno nga maprotektahan ang publiko batok sa posibleng pagsaka sa presyo sa merkado.
Gipasabot usab ni Castro nga sa wala pa molarga si Presidente Marcos paingon sa Kuala Lumpur, iyang gisugo ang DTI nga higpit nga bantayan ug ipatuman ang Suggested Retail Price (SRP) sa imported nga bugas ug uban pang mga batakang pagkaon. Dugang pa niya, gipahimangnoan usab sa Presidente ang DTI nga ipadayon ang koordinasyon uban sa mga manufacturer aron malikayan ang dili makatarunganong pagtaas sa presyo.
Samtang si Trade Secretary Ma. Cristina Roque misiguro nga ang mga stakeholder sa industriya nagtinabangay uban sa gobyerno aron mapabiling barato ug lig-on ang presyo sa merkado. Dugang pa niini nga ang buhatan sa DTI ang tanang posible aron malikayan ang pagpanglimbong ug overpricing sa mga produkto ilabi na karong holiday season.
Gipasabot usab sa Palasyo nga nagtinabangay ang tanang may kalabutan nga ahensiya sa gobyerno aron mapadayon ang patas ug makatarunganong presyo alang sa mga konsumidor.
Nagpahinumdom si Presidente Marcos Jr. nga ang gobyerno magpabiling alerto ug maningkamot nga mapanalipdan ang katawhan gikan sa taas nga presyo sa mga batakang panginahanglanon.
Photo courtesy: PCO
