Arestado ang lalaki nga gituhoang lango sa ilimnong makahubog human kini nag-wild ug nang hulga bitbit ang sundang, Oktubre 26, 2025, mga alas 4:20 sa hapon, Purok 4, Barangay San Roque, Surigao City.
Sa impormasyon sa Surigao City Police Station, nailhan ang suspek nga si Marold Crave Orozco, 48 anyos, lalaki, adunay live-in partner, driver, ug residente sa nasangpit nga lugar.
Sumala sa reklamante nga si Benjie Castro Gabor, 26 anyos, backhoe operator, ug residente sa Payawan II, Purok 7, Barangay Luna, Surigao City, ala 1:00 sa hapon sa samang adlaw, siya ug ang iyang kauban nga si Vladimer John B. Pojas, 35 anyos, ug molupyo sa naasoyng lugar. Nagtrabaho niadtong tungora sa land grading ug leveling gamit ang backhoe sa yuta, nga nahimutang sa maong lugar.
Samtang nagtrabaho sila, niabot ang suspek nga hubog didto sa site, miduol ug gibadlong sila niini apan wala nila kini tagda aron malikayan ang panagbangi.
Taud-taod mibalik ang suspetsado ug nagsugod sa pagkuha og video sa ilang gihimo gamit ang iyang Android phone, lakip na ang ongoing backhoe operation ug pagkuha og litrato sa mga existing building permits.
Nianang alas 3:30 sa hapon, samtang nag-operate si Gabor sa backhoe, nasorpresa siya sa pag-abot sa suspetsado nga misinggit, ug nanghulga “GAHE GAJOD KAMO NA OYO! DILI GAJUD KAMO MO ONDANG!” Didto na midako ang away.
Miuli ang suspetsado paingon sa iyang balay, gikuha ang usa ka sundang ug nangharas sa kalsada samtang nagbitbit sa hinagiban, misinggit na usab ug nanghagit og away.
Pag-abot sa kapulisan, naabtan ang suspek hinungdan nga ila kining giaresto. Pasakaan sa kasong paglapas sa “Grave Threats, Coercion, Violation of Batas Pambansa Blg. 6 (Possession of Bladed Weapon) ug gidala sa Surigao City Police Station alang sa tukmang disposasyon.
Photo Courtesy to:Istock
