Nipadayag sa iyang suporta si Senator Juan Miguel “Migz” Zubiri, sa dugang pondo para sa Department of Agrarian Reform (DAR) alang sa 2026 national budget. Gidayeg ang ahensya, tungod sa malampuson nga pag apod-apod sa yuta ug suporta sa mga mag-uuma.
Atol sa pagdungog sa Senado sa gisugyot nga budget sa DAR, giingon ni Zubiri nga ang departamento takos sa pagsalig sa mga mag-uuma tungod sa makanunayon nga serbisyo niini.
Gikan sa Hulyo 2022 hangtod Agosto 2025, ang DAR naghatag og kapin sa 242,000 ka titulo sa yuta samtang nag-isyu og kapin sa 401,000 ka mga sertipiko sa condonation sa utang, nga nagpagawas sa 322,000 ka mag-uuma gikan sa P41 bilyon nga utang sa yuta.
Gawas sa nahisgutan, 213 usab ka irrigation system ang natukod gikan sa 344 ka farm-to-market roads diin sumala sa survey sa Commission on Audit (COA) niadtong 2024, nakatabang sa pagpataas sa kita sa 93.65% sa mga mag-uuma sa Bukidnon.
Kalabot niini, unang nangayo ang DAR og P28B nga pundo niadtong 2026, apan ang Department of Budget and Management (DBM) mi-aprobar lang og P17B, diin matod pa niini makaapektar sa mga programa sa ahensya sama sa parcelization sa collective land titles.
Photo Courtesy to:Politiko
