Gibatikos nila US Vice President JD Vance ug Secretary of State Marco Rubio ang desisyon sa Parliament sa Israel nga angkonon ang West Bank isip kabahin na sa ilang teritoryo, human giaprobahan sa inisyal nga botasyon ang usa ka panukalang-balaod alang niini.
Ang maong lakang sa mga mambabalaod sa Israel nagpasabot nga parte na sa ilang nasud ang maong dapit, usa ka teritoryo nga dugay nang giangkon sa Palestine isip kabahin sa ilang independent state.
Matod ni Vance, usa kini ka “stupid political stunt” nga makapagrabe pa sa tensiyon sa rehiyon. Gidugang niya nga ang maong botasyon usa ka insulto ug supak sa polisiya ni US President Donald Trump nga dili angkonon sa Israel ang West Bank.
Samtang si Rubio mitumbok nga makadaot kini sa plano ni President Trump nga tapuson ang giyera sa Gaza, ug wala kini labot sa ceasefire agreement nga ilang ginasuportahan.
Apan gipaniguro ni Israeli Prime Minister Benjamin Netanyahu nga wala siyay kalabutan sa maong lakang ug gisaway kini, nga nag-ingon nga resulta kini sa kalihukan sa mga oposisyon sa parliyamento.
Giklaro usab niya nga ang iyang right-wing likud party ug ang ultra-Orthodox coalition wala mibotar pabor sa maong balaodnon, ug iyang gimando ang pagpahunong sa pagpadayon sa maong mga balaod.
Photo Courtesy to:NBC
