Kaylap nga pagkawala sa kuryente ang nasinatian sa New Zealand karong semanaha human sa kusog nga hangin nga miabot sa 155 kilometros kada oras.
Sumala sa mga awtoridad, kapin sa 90,000 ka balay ang naapektuhan samtang kapin sa 100 ka mga flight ang gikansela sa lainlaing mga tugpahanan sa tibuok nasud.
Ang South Island ug ang habagatang bahin sa North Island ang labing naapektuhan, diin miabot sa Red Alert ang hangin sa mga rehiyon sa Canterbury ug Wellington. Ang pasidaan giwagtang pipila ka oras ang milabay human mihinay ang kusog sa hangin.
Nangabali ang mga kahoy ug nangatumba ang mga poste sa kuryente sa pipila ka mga lugar, samtang daghang mga balay ang nawad-an sa ilang atop. Ang gobyerno sa Canterbury nagdeklarar og state of emergency aron mapadali ang mga operasyon sa pagtubag sa katalagman ug mabalik ang kuryente sa mga apektadong lugar.
Gitambagan sa mga awtoridad ang publiko nga magpabilin sa sulod sa balay ug likayan ang pagbiyahe samtang nagpadayon ang mga operasyon sa paghawan ug pagpabalik sa kuryente.
via: DETROIT FREE PRESS
