Gibasura sa International Criminal Court o ICC ang petisyon sa kampo ni kanhi Presidente Rodrigo Duterte nga naghagit sa hurisdiksyon sa korte sa kasong krimen batok sa katawhan nga gisang-at batok kaniya.
Sa desisyon nga gi-isyu sa ICC Pre-Trial Chamber kahagapon, Oktubre 23, giangkon sa mga huwes nga adunay igong awtoridad ang ICC sa pagpadayon sa husay batok sa kanhi presidente, bisan pa nga ang giingong mga krimen nahitabo sa Pilipinas usa ka nasud nga miatras gikan sa Rome Statute niadtong 2019.
Gibasura usab sa korte ang hangyo sa kampo ni Duterte nga i-postpone ang pag-isyu sa desisyon, ingon man ang ilang hangyo alang sa temporaryo nga pagpagawas sa kanhi presidente. Tungod niini, ang kaso magpadayon sa ICC headquarters sa The Hague.
Kahinumduman nga gidakop si Duterte niadtong Marso 11 pinaagi sa warrant gikan sa ICC, kabahin sa imbestigasyon sa liboan ka mga namatay sa kampanya batok sa droga ubos sa iyang administrasyon.
Niadtong Septiyembre 23, gi-postpone sa korte ang pagkumpirma sa mga kaso human nangayo ang depensa og dugang panahon sa pagpresentar sa ilang mga argumento. Apan sa pinakabag-ong desisyon sa Pre-Trial Chamber, gibasura usab ang tanang hangyo sa kampo sa kanhi presidente.
Busa, magpadayon ang proseso sa ICC, samtang ang kalibutan nagtan-aw sa sunod nga mga lakang sa kaso batok sa kanhi Presidente Duterte.
via: ICC
