Gibatikos sa Alliance of Concerned Teachers (ACT) ang Department of Public Works and Highways (DPWH) tungod sa kakulang niini og konkretong aksyon aron masulbad ang problema sa kakulang sa mga klasrum sa tibuok nasod.
Sumala ni ACT Chairperson Ruby Bernardo, ang target nga 1,700 ka classroom nga ipatukod sa DPWH dili igo aron matubag ang 165,000 ka classroom shortage nga giatubang sa sektor sa edukasyon.
Iyang gipasabot nga kini usa ka klarong porma sa pagpabaya sa DPWH, nga nagresulta sa kakulang sa kalidad sa edukasyon ug kakulang sa maayong kondisyon sa pagtuon sa mga kabataan.
Gihagit usab ni Bernardo si Presidente Ferdinand Marcos Jr. nga tagaan og prayoridad ang dugay nang isyu sa classroom shortage, pinaagi sa paghatag og igo nga pondo ug mas episyenteng koordinasyon tali sa Department of Education (DepEd) ug sa DPWH.
Gidugang pa sa ACT nga kinahanglan nga usbon sa gobyerno ang pamaagi sa pagplano ug pagpundar sa mga imprastruktura sa edukasyon, aron matino nga matubag ang panginahanglan sa matag rehiyon ug lungsod.
Padayon karon ang ACT sa pagpangusog sa mga reporma aron mapatuman ang matinud-anon ug episyenteng solusyon sa kakulangon sa mga klasrum diin usa kini ka problema nga dugay nang gipas-an sa sektor sa edukasyon sa Pilipinas.
PHOTO COURTESY TO:DPWH
