Naluwas ang 25 ka mga Pilipino nga biktima sa human trafficking sa Myanmar, human sila nakatabok sa utlanan tali sa Myanmar ug Thailand uban sa 167 ka mga tawo nga parehas usab nga biktima sa pagpanglimbong ug pagpang-abuso.
Sumala sa report, daghan pa gihapon ang nagpabilin sa Myawaddy, usa ka lugar sa Myanmar, tungod kay nagpaabot pa sila sa clearance gikan sa militia nga nagkontrolar sa maong lugar.
Kagahapong adlawa, Oktubre 23, nagpatuman og raid ang Democratic Karen Benevolent Army (DKBA) batok sa mga scam compounds nga nahimutang sa KK Park, usa sa labing dagkong sentro sa mga online scam operations sa maong nasod.
Gibanabana nga 677 ka mga biktima ang miikyas gikan sa KK Park ug mitabok sa Moei River padulong sa Thailand aron makalikay sa maong operasyon. Apil sa nakatabok ang 25 ka mga Pilipino nga midangop sa kaluwasan bisan walay pasaporte.
Padayon karon ang koordinasyon tali sa Philippine Embassy sa Thailand ug mga awtoridad sa Myanmar ug Thailand aron masiguro ang kaluwasan ug repatriation sa mga Pilipinong naluwas gikan sa human trafficking.
Photo courtesy to:PNA
