Gisiguro ni Pangulong Ferdinand “Bongbong” Marcos Jr. nga walay luna sa Pilipinas ang iresponsableng pagmimina, samtang iyang gipanawagan ang responsable, inklusibo, ug climate-resilient nga industriya sa pagmimina sa nasud.
Atol sa iyang mensahe sa pagbukas sa Mining Philippines 2025 International Conference and Exhibition nga gipahigayon sa Taguig City, giingon sa Pangulo nga importante ang pagpanalipod sa kinaiyahan samtang ginapadayon ang paglambo sa ekonomiya.
Matod ni Marcos Jr., ang pagmina kinahanglan maghatag ug tinuod nga benepisyo sa katawhan, sama sa pagtukod sa mga eskwelahan, ospital, ug kalsada nga maghatag og paagi sa mga komunidad ngadto sa dagkong oportunidad alang sa kalamboan.
Gipasiugda usab sa Pangulo ang pagpalig-on sa transparency ug accountability sa industriya aron masiguro nga makapahimulos ang katawhan sa kabtangan gikan sa kinaiyahan.
Lakip sa mga inisyatibo sa administrasyon ang Enhanced Fiscal Regime for Large-Scale Metallic Mining Act, nga nagtumong sa patas ug klarong sistema sa pagkolekta sa buhis, ug ang Philippine Ecosystem and Natural Capital Accounting System Act, nga nagtinguha sa pagsukod ug pagpanalipod sa natural nga yaman sa nasud.
Sumala sa Pangulo, kini nga mga reporma nagpalig-on sa pagsalig sa publiko ug sa mga mamumuhunan, samtang ginapaniguro nga mahimo ang industriya sa pagmimina nga modelo sa malungtarong kauswagan.
Dugang pa ni Marcos Jr., kinahanglan nga tanang operasyon sa pagmimina sa Pilipinas magsunod sa mga balaod sa nasud, lakip ang Paris Agreement ug ang Philippine Energy Plan. Tumong niini nga mga polisiya ang pagpauswag sa sektor sa enerhiya ug pagmimina nga dili makadaut sa kalikupan ug magpabilin nga sustainable alang sa umaabot nga henerasyon.
Photo Courtesy: Presidential Communications Office
