Gipangdakop ang duha ka lalaki human nga nag-hurmentado sulod sa KTV Bar, Kagahapon, alas 2:47 sa kaadlawon, sa may Bilang-bilang, Borromeo Street, Barangay Taft, Dakbayan sa Surigao. Sa impormasyon gikan sa Surigao City Police Station, nakadawat sa report nga adunay nahitabong kagubot sa Central Bar and KTV nga nahimutang sa nasangpit nga lugar.
Naila ang mga suspek nga sila Marjun Batiancila Ledamo, 20 anyos, mangingisda, ug residente sa Purok 5, Barangay Canlanipa, Surigao City ug Nordy Abrahan Inahid Jr., 18 anyos, laborer, ug residente sa Purok Love, Bernadette Village, Barangay Luna, Surigao City.
Sa inisyal nga imbestigasyon sa kapulisan, nasayran nga nag-inom niadtong tungora ang duha sa managlahing lamesa. Sa dihang nakita ni Inahid ang iyang kanhing uyab nga si Jaybeth Payospos nga kauban si Ledamo dihang nanggawas kini sa maong establisemento.
Gisundan kini ni Inahid ug giistoryahan ang ex-girlfriend aron mangumusta. Apan ang maong aksyon nakapasuko nga misangpot sa kagubot sa duha ka binuhat.
Didto na nagsumbagay ang duha, nisulay paghulbot sa gitakin nga kutsilyo si Inahid apan napugngan kini sa mga istambay ug nahunong ang away. Gipangdakop ang duha ug pasakaan sa kasong Alarms and Scandals lakip na ang pagdala sa deadly weapon. Gikustodiya na sa Surigao City Police Station alang sa tukmang disposisyon.
Photo for illustration courtesy to:freepik
