Patay na ang American chess grandmaster nga si Daniel Naroditsky sa edad nga 29-anyos. Gikumpirma kini sa Charlotte Chess Center sa North Carolina diin nagsilbi si Naroditsky isip coach apan wala na gibutyag pa ang detalye sa iyang kamatayon.
Nisikat ang 29-anyos nga chess grandmaster tungod sa iyang pag-livestream sa iyang dula ug pagtudlo usab sa mga interesadong magdula og chess. Natawo sa San Francisco Bay Area diin sa edad nga sayis (6) nakat-on siya sa pagdula og chess.
Niadtong high school pa lang siya, gideklara na siya isip grandmaster, ang pinakataas nga pag-ila sa International Chess Federation.
Nakadaog siya og grade-level national championships sa duha ka higayon ug sa fifth grade nahimo siyang labing batan-on nga magdudula nga nakadaog sa California K-12 Championship. Niadtong Nobyembre 2007, nakab-ot niya ang under-12 World Youth Chess Champion.
Photo courtesy: Charlotte Chess Center
