Gipangandaman na karon sa Senado ang plano nga tapyasan og 15% hangtod 20% ang pondo sa Department of Public Works and Highways (DPWH) nga gisang-at alang sa 2026 National Budget, partikular sa mga proyekto sa imprastruktura sa tibuok nasud.
Sumala ni Senate President Vicente “Tito” Sotto III, ang maong lakang resulta sa ilang konsultasyon uban ni Senate Committee on Finance Chairperson Sen. Sherwin Gatchalian, human masuta ang kadaghang insidente sa sobra nga pagpresyo sa mga proyekto sa DPWH sa nagkalain-laing rehiyon.
Matod ni Sotto, kinahanglan nga mas mapugngan ang pag-abuso ug dili hustong paggamit sa pondo sa katawhan. Si Sen. Gatchalian, sa iyang bahin, mipasabot nga base sa ilang paunang imbistigasyon , adunay kapin sa ₱10.3 bilyon nga kantidad sa farm-to-market road projects nga gipundohan sa 2023 ug 2024 ang posibleng adunay “overpricing” ug mga iregularidad sa implementasyon.
Gidugang pa sa senador nga aduna silay nadawat nga impormasyon nga pipila ka district engineers ug opisyal sa DPWH ang nakigkunsabo sa mga kontraktor ug gitugotan ang grabi nga pagpresyo sa mga proyekto samtang nagbayad pa sa mga ginatawag nilang “proponents” o mga nagmugna sa proyekto.
Tungod niini, nanawagan ang Senado sa pagpatuman og mas lawom nga imbestigasyon dili lamang sa DPWH apan usab sa mga proyekto nga naggamit sa pondo gikan sa mga special infrastructure funds.
Lakip usab sa gipaabot nga imbestigahan mao ang mga super health centers nga gi-allocate-an og budget ubos sa Department of Health (DOH), diin kapin sa 300 niini ang napamatud-ang non-operational hangtod karon, bisan pa nga nagamit na ang dagkong kantidad sa pondo.
Giklaro ni Sotto nga dili kini usa ka pamaagi aron pugngan ang paglambo sa imprastruktura, apan usa ka pahinumdum sa mga ahensya sa gobyerno nga kinahanglan adunay “accountability ug transparency” sa paggamit sa pondo sa gobyerno.
Sa pagkakaron, gilauman nga isumite sa Senado ang mga committee reports gikan sa Senate Blue Ribbon Committee ngadto sa Department of Justice (DOJ), Independent Commission for Infrastructure (ICI), ug Office of the Ombudsman aron tukion nga mga kasong administratibo ug kriminal batok sa mga responsable.
Photo credit: PNA
