Magsugod na sa Oktubre 27 ang pormal nga training sa Gilas Pilipinas alang sa umaabot nga Southeast Asian (SEA) Games nga ipahigayon sa Thailand gikan Disyembre 9 hangtod 20, 2025.
Sumala ni Coach Norman Black, naghulat pa sila karon sa pinal nga desisyon sa Organizing Committee bahin sa eligibility policy sa pipila ka mga players nga sakop sa listahan sa koponan.
Gipasabot sa coach nga ubay-ubay sa mga players ang kasamtangang pending tungod sa “passport-only policy” nga ginapatuman sa SEA Games Organizing Committee. Lakip sa mga apektado mao sila Ange Kouame, Remy Martin, Michael Philips, ug Kymani Ladi.
Gilauman nga karung adlawa, ipahigayon ang pormal nga miting sa Organizing Committee aron aprobahan ang mga pangalan sa mga players nga makadula sa torneo.
Samtang, lakip sa kasamtangang official lineup sa Gilas alang sa SEA Games sila Ray Parks, Thirdy Ravena, Matthew Wright, Greg Slaughter, Veejay Pre, ug duha pa ka players nga wala pa ipadayag ang ngalan.
Dugang pa niini, adunay usab mga standby players nga ginapanid-an, lakip na sila Dave Ildefonso ug Jason Brickman, nga kasamtangang nagdula pa sa ubang mga lokal ug internasyonal nga liga.
Nagpahayag si Coach Black sa iyang paglaom nga mapahimutang ang tanang dokumento ug maaprobahan sa Organizing Committee ang ilang mga import ug dual citizen players aron mahimong mas lig-on ang lineup sa Gilas Pilipinas.
Gipangandaman usab sa team ang mas hugot nga training camp ug tactical preparation aron mapanalipdan ang kampeonato nga ilang gipaningkamutan sa miaging SEA Games, ug mapakita pag-usab ang kaisog ug kahanas sa Pilipinas sa basketball arena sa rehiyon.
Photo ctredit: SPIN.PH
