Nadamage ang usa ka wingvan truck human mipalyar ang preno og nadisgrasya sa Barangay Bulatok syudad sa Pagadian mga alas 9:00 sa buntag, Otober 17, 2025. Sa nakuhang report sa Juander Radyo Pagadian naila ang driver nga si Michael Fabria, hingkod ang edad, residente sa El Salvador City, Misamis Oriental kauban iyang pahenanteng lalaki.
Saysay sa driver nga gikan pa sila sa Zamboanga City nagkarga og 25,000 kilos nga uling nga dalhon unta paingon sa Cagayan de Oro City. Apan pag-abot nila sa dulhogon nga bahin sa lugar, wala na mihawid ang break hinungdan gikabig niini ang manubela ug gibangga sa bakilid nga bahin.
Swerteng walay napagan nga tawo sa maong disgrasya og wala ra usab silay tatsa kauban sa iyang pahinante. Ang windshield lang sa truck maoy nabu-ak ug nadamage lakip ang kanding nga gitugway sa dapit nga napuruhan ug napiang.
Bisan sa maong hitabo, nakahimo ra gihapon sa pagpasalamat ang driver gumikan nga wala nakalahos ang ilang sakyanan sa ubos og nalikayan ang dakong kadaot.
