Gikataho sa National Disaster Risk Reduction and Management Council (NDRRMC) kagahapong adlawa nga mokabat na sa 76 ang ihap sa mga kompirmadong namatay sa nahitabong magnitude 6.9 nga linog nga miigo sa Bogo City, Cebu ug sa mga kasikbit niini nga dapit.
Kahinumdoman nga miigo ang linog niadtong Septiyembre 30, nga miresulta sa pagkaguba sa mga bilding ug mikalas ug mga kinabuhi. Base sa pinakaulahing report sa NDRRMC nga ang tanang nangamatay padayon pa nga gi-validate nga gikan sa Rehiyon 7 (Central Visayas).
Dugang pa niini, gi-validate usab sa NDRRMC ang 559 nga gikatahong mga kaswalti nga resulta sa kusog nga pagtay-og sa lugar. Tungod sa maong panghitabo, miabot na sa 216,962 ka pamilya o 748,025 ka tawo ang apektado nga nanimuyo sa 260 ka barangay sa Central Visayas.
Samtang 126,932 ka mga balay ang nadamage diin 7,295 niini ang nangaguba tungod sa linog, kini subay sa report sa disaster response agency.
Kalabot niini, una ng mibisita si Presidente Ferdinand R. Marcos Jr. sa Bogo City aron sa pagsusi sa nangaguba nga mga imprastraktura ug nakigtagbo sa mga apektadong pamilya.
Photo courtesy to:Mindanao Balita
