Nanawagan si House Deputy Minority Leader ug Mamamayang Liberal Partylist Rep. Leila de Lima kang Presidente Ferdinand “Bongbong” Marcos Jr. nga i-livestream ang tanang hearing sa mga anomalosong flood control projects sa Independent Commission for Infrastructure (ICI).
Matod ni De Lima, kon tinud-anay nga pasalig ni Presidente Marcos sa pagpasiugda sa transparency, dili unta niya tugotan ang ICI nga itago gikan sa publiko ang pag-uswag sa imbestigasyon niini sa kurapsyon sa mga flood control projects.
Giklaro ni De Lima nga naumol ang ICI tungod kay gusto sa publiko nga mahibaw-an ang tibuok kamatuoran, mao nga binuang lang nga itago na lang nila ang mga hearing niini.
Si Las Piñas City Representative Mark Anthony Santos, sa laing bahin, niinsistir nga ang paghimo sa ICI proceedings sa publiko magpasiugda sa transparency, accountability, ug fairness, ilabi na sa mga butang nga naglambigit sa binilyon ka pesos nga kuwarta sa katawhan.
Matod pa ni Santos nga pinaagi sa livestreaming, mabantayan sa publiko kung unsa gayud ang nahitabo, mahibal-an kung kinsa ang husto, ug malikayan ang pagtabon ug impluwensya sa politika.
Photo courtesy to:The Monthly
