Misaad si kanhi House Speaker Martin Romualdez nga ipaambit niya ang tanang impormasyon nga iyang nahibal-an aron makatabang sa Independent Commission on Infrastructure (ICI) sa paspas nga imbestigasyon bahin sa korapsyon sa mga proyekto sa imprastruktura sa nasud.
Niadtong Martes, miabot si Romualdez sa ICI headquarters sa Taguig City human siyang gipatawag pinaagi sa subpoena aron hisgutan ang iyang kahibalo sa budget process ug sa mga DPWH flood control projects.
Matod ni Romualdez, andam siyang motabang sa pagpasabot sa proseso sa badyet ug maghatag og impormasyon aron matino ang kamatuoran ug mapaspasan ang fact-finding investigation.
Si Romualdez usa sa mga kongresistang nadala sa isyu sa flood control corruption scandal, human sa pahayag sa usa ka kanhing security consultant ni dating Rep. Zaldy Co nga nakadawat siya og kickback gikan sa proyekto sa gobyerno — usa ka akusa nga iyang gideny.
SOURCE: INQUIRER.NET
