Duha ang kompirmadong patay human nga nahagsa ang usa ka gamay nga eroplano duol sa Hicks Airfield sa Fort Worth, Texas niadtong Oktubre 12, 2025, kini sumala sa report nga gipagawas sa mga otoridad.
Nasayran nga sa dihang nakadawat ug tawag ang kapulisan kabahin sa maong insidente, dali dayung gipadala ang mga yunit gikan sa Fort Worth Fire Department sa North Saginaw Boulevard.
Samtang gikumpirma usab ni Public Information Officer Craig Trojacek sa Fort Worth Fire Department nga wala pay eksaktong impormasyon kung asa gikan ang maong eroplano.
Dugang pa niini nga nahagsa ang twin-engine jet sa likod nga bahin sa parkinganan sa usa ka industriyal nga lugar kun diin asa daghang mga negosyo ang naapketuhan ilabina ang mga 18-wheelers, trailers, ug campers.
Sa karon wala pa nagpagawas ug identidad sa mga biktima ingon man padayon pa usab ang Federal Aviation Administration (FAA) sa paghimo ug imbestigasyon.
Photo courtesy to: The New York Times
