Kadaghanan sa mga Filipino nagtuo nga si kanhi Presidente Rodrigo “Digong” R. Duterte kinahanglan nga manubag sa kamatayon sa mga tawong nalambigit sa war on drugs sa iyang administrasyon.
Kini ang migawas sa labing bag-ong survey sa Social Weather Stations (SWS), nga gihimo gikan Setyembre 24 hangtod 30, 2025. Ang survey nag-interbyu og 1,500 ka adults sa tibuok nasod ug adunay ±3 percent margin of error.
Makita sa resulta nga samtang 50% sa mga respondent ang mouyon nga kinahanglan manubag si Duterte, adunay 32% usab ang supak niini. Gibana-bana nga 15% ang wala pa makadesisyon (undecided), ug 4% ang wala mohatag sa ilang tubag.
Ang Visayas ang nakatala sa kinatas-ang ‘suporta alang sa pagpanubag (support for accountability) nga anaa sa 54%, gisundan sa Metro Manila (53%), Balance Luzon (52%), ug Mindanao (39%).
Gipagawas ang resulta sa survey human sa desisyon sa International Criminal Court (ICC) nga isalikway ang hangyo sa kampo ni Duterte alang sa temporaryong pagpagawas (interim release).
Sa nahimong desisyon sa ICC, nagkanayon kini nga kinahanglan nga ipadayon ang detensyon sa kanhi Presidente aron “masiguro ang iyang pagpakita sa trial, mapugngan siya sa pagbabag sa imbestigasyon o sa proseso; ug aron mapugngan ang posibleng paghimo og dugang mga krimen.”
Photo courtesy: Social Weather Station
