Gibutyag ni Konsehal Eric Salcedo nga nangunay na si Mayor Rolando Uy diha sa paglunsad og mga lakang aron nga mapaspasan ang pagsolbad sa mga backlog o wala nakolekta nga mga basura sa syudad.
Sa ilahang panagtigom kagahapong adlawa, gisaysay ni Konsehal Salcedo nga unang gimando sa Mayor ang hingpit nga pagputol sa kontrata tali sa syudad og sa kompanyang JOMARA nga kasamtangang nagadumala sa Pagalungan Sanitary Landfill nga sa ilahang tan-aw dili epektibo sa ilahang taas nga dumalaan ang nahisgutang landfill.
Matod pa ni Salcedo nga i-takeover sa City Engineer’s Office ang pagdumala sa landfill samtang naghatag og 10 hangtud katorse kaadlaw ang mayor aron nga matubag ang backlogs sa koleksyon sa basura.
Labing gikinahanglan sab nga magdungag og manpower ang bag-ong kolektor sa basura nga Standard System tungod sa kakulang sa ilahang palero.
Samtang aduna sab private sector nga adunay mga ekipo ang ning saad nga mutabang sa paghakot og basura apan giklaro sa Konsehal nga kini libre ug boluntaryo lamang.
Photo courtesy: City information Office
