Nasikop sa kapulisan sa Sta. Ana atol sa gilusad nga entrapment operation ang usa ka manager sa Vanguard Security Agency ug usa ka miyembro sa kapulisan human makuha-an og mga tag-as nga armas alas 4:50 Oktubre 13, 2025, sa Roxas Avenue, Brgy. 32-D, Davao City.
Sa report gikan sa Davao City Police Office (DCPO), giila ang mga nadakpan nga sila alyas “Louie” ug alyas “Muhammad”, nga usa ka pulis nga na-assign sa Regional Mobile Force Battalion-14 sa Bangsamoro Autonomous Region (BAR).
Sumala pa, usa ka pulis ang nagpaka-poseur buyer hinungdan nga napalitan ug nakuha gikan sa posisyon sa mga suspek ang duha ka Caliber 5.56 M4 rifles, duha sab ka .45 caliber pistols, mga magazine, mga bala, ug usa ka unit sa Toyota Vios (dark brown) nga maoy gisakyan sa mga suspek.
Ang duha ka dinakpan kasamtangang detinado sa Sta. Ana Police Station diin sila mag-atubang og kasong paglapas sa Republic Act 10591 o Illegal Possession of Firearms and Ammunition.
Photo courtesy to: Sta. Ana Police Station
