Gipasigarbo sa Philippine National Police (PNP) ang pagkunhod sa mga kaso sa krimen sa Pilipinas karong tuig. Base sa datos sa PNP, gikan Enero 1 hangtod Oktubre 9, 2025, adunay 27,306 ka kaso sa focus crimes nga natala mas ubos kini og 14% kumpara sa 31,878 ka kaso nga narehistro sa samang panahon niadtong 2024, sumala sa pamahayag ni PNP Spokesperson Police Brigadier General Randulf Tuaño.
Ang mga focus crimes naglakip sa carnapping, pagpangawat sa motorsiklo, robbery, rape, theft, murder, homicide, ug physical injury.
Pinakadakong pagkunhod ang natala sa kaso sa rape nga mikunhod og 22%, gisundan sa robbery nga adunay 17.35% nga pagkunhod.
Gipasabot usab sa PNP nga walay natala nga insidente sa pagpangawat o looting atol sa mga linog nga nahitabo sa Cebu ug Davao Oriental, nga nagpakita sa epektibo nga presensya ug operasyon sa kapulisan sa mga apektadong lugar.
Gipasidunggan sa PNP ang ilang mga pulis, lokal nga otoridad, ug komunidad sa ilang kooperasyon ug aktibong partisipasyon sa pagpalig-on sa seguridad ug kalinaw sa nasud, taliwala sa mga hulga ug kalamidad nga giatubang karong panahona.
Photo courtesy: Nes Inquirer
