Lima ka tawo ang gikataho nga naangol human nahagsa ang usa ka helicopter sa parkinganan sa Huntington Beach, California niadtong Sabado sa hapon (oras sa U.S.), Oktubre 12.
Matod sa mga opisyal sa dakbayan, nahitabo ang insidente mga alas 2 sa hapon. tali sa Twin Dolphins Drive ug Beach Boulevard, duol sa dapit sa “Cars and Copters” nga kalihokan nga gikatakda sa niadtong adlawa.
Duha sa mga naangol sakay sa helicopter, samtang tulo pa ang mga sibilyan nga naa sa palibot sa nahitaboan sa aksidente. Gidala dayon sila sa tambalanan, apan walay opisyal nga taho sa ilang kahimtang.
Base sa inisyal nga mga report, mipatin-aw nga adunay technical malfunction ang nahitabo sa wala pa nahagsa ang helicopter, diin bisan og walay nahitabong pagbuto, gikataho nga mitulo ang gasoline niini hinungdan nga miresponde dayon ang mga bombero ug emergency personnel aron masiguro nga luwas ang lugar.
Padayon pa nga nag-imbestiga ang Federal Aviation Administration (FAA) ug ang National Transportation Safety Board (NTSB) sa hinungdan sa aksidente, ug sa pagkakaron, temporaryong gisirad-an sa publiko ang bahin sa parking area alang sa imbestigasyon ug clearing operations
via: The New York Times
