Nakahatag og kusog nga performance ang two-time Olympian sa Weightlifting nga si Elreen Ando aron makuha ang bronze medal sa women’s 63kg clean and jerk sa 2025 IWF World Weightlifting Championships niadtong Domingo.
Ang 26-anyos nga Cebuana mipataas og 131 ka kilo sa clean and jerk aron makuha ang podium finish, luyo ni Ri Suk (142kg) sa North Korea ug Maude Charron sa Canada (133kg), ang Tokyo 2020 Olympic champion ug Paris 2024 silver medalist.
Si Ando, kinsa nagrepresentar sa Pilipinas sa Tokyo 2020 ug Paris 2024 Olympics, padayong nagpalig-on sa iyang status isip usa sa mga nag-unang weightlifter sa nasod human sa pagretiro ni Olympic champion Hidilyn Diaz-Naranjo.
Samtang sa men’s division, si Albert Ian Delos Santos mikulit sa iyang ngalan sa history books pinaagi sa paghimo og bag-ong junior world record sa clean and jerk sa men’s 71kg class.
Ang 19-anyos nga taga-Zamboanga milangkat og 185 ka kilo sa iyang ikatulong pagsulay, nga milabaw sa miaging junior world record. Nabutang siya sa ikalima sa kinatibuk-an sa clean and jerk category.
via: DT/VP
